La Usc di Ladins

La Gran Santa Maria ie na festa catolica, pra chëla che l vën festejà l’Assunzion dla Santa Maria tl ciel. 
Daujin ala mësses acumpa­nie­des da mujiga ti luesc dla valeda, ulache l ie nce stat l mesun de lascé benedì la mana, àn nce urganisà n prugram de curnisc.
A Urtijëi àn fat na defileda y daldò fòvel n cunzert cun i corns da mont da pert dla grupa »Ladinia«. Da sëira iel stat l gran cunzert cun l »Merano Pop Symphony Orchestra« sun plaza de dlieja che à cun si meludies purtà adalerch n gran publich. A Santa Cristina àn ai 14 de agost ta Iman fat na show cun i schi y purtà nscila l inviern a mesa al luech y la sajon ciauda. Cun d’uni sort de pitli spetaculi ju per la nëif ti àn fat legrëza ala jënt. 
Te Sëlva àn metù a jì n prugram drët rich per la Gran Santa Maria. N juebia ai 14 de agost da sëira iel stat n cunzert dla grupa »Vasco Tribute«. N vënderdi ai 15 de agost àn domesdì fat na defileda dla lies.

Deplù n con' de chësta manifestazions ons scrit tla edizion nueva che vën ora n vënderdi ai 22 de agost. L ie nce n valguna mprescions fotografiches a chëles che ti pudëis cialé.

Julia Lardschneider