La Usc di Ladins

Döt adöm 56 partezipanc, 53 che oress cumpré n cuatier y la maiú pert poscibilmënter "atira". Insciö podesson trá adöm dër en cört le resultat dla inrescida sön les abitaziuns a prisc lié, inviada ia tres le Comun da La Val en colaboraziun cun la Consulta dla jonëza ladina. Propi a La Val êl sté de jügn na serada por informé sön chësta poscibilité nöia da rové pro n’abitaziun de proprieté a n prisc plü da sciafié y l’interes ê bele iló sté dër gran. Insciö á le Comun orü jí plü tl concret, meton online n chestionar olache les porsones podô manifesté plü concretamënter so interes y ince sü dejiders de abité. La inrescida é gnüda tignida danter i 11 de jügn y i 13 de messé, y l’edema passada él gnü publiché i resultac, che é zënzater interessanc.

Deplü sön i resultac dla inrescida ciafëise t’La Usc di Ladins di 22 d’agost. Lapró ince na intervista cun l’ombolt da La Val Felix Nagler.  (pablo)