La Usc di Ladins

Jon inant chesta setemèna con n’autra intervista a na joena che se à tanche laureà. Aon sentù Gaia Ghetta da Vich che à fenì su si prumes trei egn de università te la facoltà de turism a Bornech. Con ela aon rejonà de overturism, de evenc sportives, Copa del Mond e Olimpiades.

Che studies èste fat?

Gaia Ghetta É fat l liceo turistich ja Pardac e do me é scrit ite a l’Università jun Busan ajache é semper volù studiar ence i lengac. É cernù la facoltà de turism te la senta destacada de Bornech.

Endana i studies èste fat ence esperienzes de lurier tel turism?

Ei, ades son do che laore te ofize di foresć de l’ApT olache é lurà ence chest invern e l istà passà, l é la terza sajon che fae.

Na bela esperienza te l’ès fata ence col Comitat de la Copa del Mond, ne conteste?

Ei, de jené e firé del 2024 é domanà de poder far l tirocinie per l’Università col Comitat Gregn Evenc de Fascia. A mi me à semper piajù l schi, ge varde a le gare, donca me saea che sie l post più adatà, é fat n coloquie e i me à tout.

Co éla jita?

L é stat beliscim, n muie enteressant e formatif, é emparà trop e é cognosciù n muie de persone. Al scomenz mie percors de studies l era più leà al turism, defat l cors de laurea l à inom »Management del turism, di sport e di evenc«, do chesta esperienza se à avert ence l usc di evenc.

Sun chest dapò te ès fat ence la tesi noe?

Ei, l titol de mia tesi, che é fat per ingleis, l é: »La Copa del Mond te Fascia e le percezion de la jent da chiò«. La Copa del Mond de schi l é n event de gran dimenscion che à n peis su la jent che stasc te val, l é bel ma i sentadins i lo sent, con efec tant positives che negatives.

Duta l'intervista su La Usc stampèda de en jebia ai 14 de aost del 2025  (Monica Cigolla)