La Usc di Ladins

A cësa àla n tel gran castl plën de diaresc. Ani y ani alalongia àla scrit su avisa uni di cie che l suzedova, coche la se sentiva, cie che la audiva. Y chël te trëi rujenedes: ladin, tudësch y talian. Irene Moroder de Urtijëi ne n’ie nia segura de vester na scritëura, la pascion per l scrì y l liejer dant àla dessegur y chëla l’à bele purteda lonc. Coche maestra dla scola elementera ti àla for liet dant gën stories ai mutons y ala mutans. Dan n diesc ani àla pona abinà l sie: l poetry slam. N mescedoz danter scrì y liejer dant, ulache l test ne vën nia scrit per unì stampà, ma per l purté dant sun na paladina.

A mez setëmber àla fat pea pra la fineles dl campiunat provinziel de poetry slam tl teater Gries a Bul­san. Mé i miëur diesc artisć, che se à cualificá tla sëires de selezion, possa tlo fé pea. L se trata de purté dant n test scrit nstës, l lijan ju o adamënz. La tematica ie liedia, n possa rujené mpue de dut, nce i stii ie desfrënc, ma n muessa se tenì a n valguna regules: n ne possa nia purté dant tesć scric dala nteligënza artifiziela, n ne possa nia se mascheré y n à a despusizion al mascim cin’ menuc.

Elisabeth Kostner

L articul tla edizion atuela de La Usc di Ladins.