La Usc di Ladins

»De gra, criedeme: l ie tan velch de bel, pudëi liejer dant a zachei che ntënd«, à dit Rut Bernardi ala fin dla sëira. L fova paroles che univa dal cuer, da na autora ladina useda a liejer dant a n publich che ne ntënd nia.

Y propi perchël, coche l ie nce scrit tl cudejel dat ora aposta per la sëira, ie Rut Bernardi cun si leteratura ladina capiteda ti juesc de paroles, ie pu l gherdëina na rujeneda rica de vocai y tan adateda a vel’ da de tel. L ie belau mpue na mujiga, chëla che n aud ora dala poejies dla autora.

Per la sëira mujighela, che n à metù a jì n vënderdi ai 3 de utober tla Cësa di Ladins y che fova bele unida a s’l dé n iede a Dispruch, à Rut Bernardi cris ora na lingia de si poejies, che la grupa de mujiga eseleptitun à cumpanià cun meludies. 

Elisabeth Kostner

L articul tla edizion atuela de La Usc di Ladins.