La Usc di Ladins

I Cors de Dlijia (rapresentá en chësc iade düc 12 tla Val Badia) cun siur Degan Iaco Willeit y le presidënt dl’EPL Iaco Rigo á albü deplü argomënc sön mësa en lönesc sëra a San Martin de Tor. Danter l’ater él gnü dé pro ala colaboraziun damanada da Badiamusica por festejé cun n conzert ai 23 d’agost 2020 i 20 agn de ativité de Badiamusica. Deplü sará i cors y ciantadus singui fora dai cors che tolará pert al conzert. L’EPL instës recorda en chësc ann i 60 agn de ativité. Te chësta ocajiun (d’altonn) podessel gní fora le liber de oraziuns y cianties de dlijia "Laldun le Signur", che é la verjiun nöia dla Val Badia di libri de oraziuns y cianties, y ince l’ediziun ladina dl "Gotteslob" gnü fora tles Diozejes de lingaz todësch dan set/sis agn.
Tla sentada él gnü dé da plü perts informaziuns detaiades por tigní cursc de formaziun dla usc, por ciafé leteratöra por cors, por damané do contribuc y reformé le statut aladó dles disposiziuns gnüdes fora l’ann passé. N gran dilan ai manajadus dla seziun Cors Sepl Pezzei, Chiara Marcocci, Elio Clara y Ulrich Willeit, ti él gnü sport ofizialmënter da siur Degan y dal pres. dl’EPL.