La Usc di Ladins

La mapa ofiziala dla Provinzia dla situaziun atuala y la curida wireless di providers Antea, BB44 y NGI, mostra sö ci paisc che é bele liá ala rëi dla fira otica: Al Plan, Rina, San Martin de Tor, Lungiarü, Antermëia, La Val, Badia/Pedraces, La Ila y Corvara. Da Gherdëna sö röia la fira cina sön Frara. 

Baian cun le diretur dl Ofize Infrastrotöres por telecomunicaziuns dla Provinzia de Balsan Marco Springhetti vëgnon al savëi che p.ej. la fira otica röia cun condütes y cordes cina tl zënter da Rina, olache la scolina y la scora é bele coliá. Ci che mancia dötaurela é la gestiun dl sorvisc dal hotspot Telecom por dötes les ciases y i eserzizi dl paisc. Te chisc tëmps de "home work" (laur telematich a ciasa) y "home school" (leziuns a ciasa) s’anadá sambëgn les families che so segnal internet, tres na tle o le smartphone da agn, ne tleca nia. Deplü zitadins zënza la fira otica te ciasa – y de chisc n’él dai milesc tres ciamó – apelëia ai comuns da fá inant cun i proiec y i laurs por mëte les condütes y trá i fis cina pormez a ciasa.

La fira otica tl Comun de Mareo

Ince les fraziuns y viles de Mareo é ciamó zënza la fira otica. Al é propostes concretes sön mësa por sorví tosc almanco na pert dles dites y ciases dla fraziun da Curt cun la fira, mo por le rest pé al momënt döt chit. Sëgn é ince tröc laurs chic por l’efet coronavirus, mo proiec y planns podessel impó gní lauré fora.

"Na bona chance ess sëgn le Comun de Mareo, sce al mostra interes", dij le diretur Springhetti, y chësc garatass tres n program de investimënc scrit fora cina ai 3 de jügn 2020 por i raiuns rurai/agricui. Al é finanziamënc che vëgn indiretamënter dal’Uniun Europeica. Le Comun de Mareo resultëia te na gradatöra provinziala por intervënc de svilup te raiuns rurai al 22ejim post, ciamó dan p.ej. al Comun da La Val che é da ciafé ala 42ejim posiziun. Aladó de Springhetti á bele i comuns che é tla gradatöra dancá anuzé i finanziamënc por se lié ala rëi dla fira otica publica, a na manira che ara podess ti toché sëgn a Mareo. Mareo oress dí te chësta zircostanza les viles fora dai zëntri y le paisc d’La Pli. A desposiziun él cina n miliun de euro. Le fonds scrit fora sëgn dai 2 de merz incá, cina ai 3 de jügn 2020, é ciarié indöt cun 3 miliuns de euro, y é destiné a proiec da svilupé söl teritore südtirolesc la "fira leria".

Aladó de Springhetti podess le Comun lascé lauré fora n proiet monü por chisc intervënc: "Al n’é nia de spaterlé ia, le proiet pó dagnora avëi valüta, ince sce le Comun de Mareo ess da tomé sot grata tl concurs, y gní spo realisé man man, o toch por toch, tl dagní." Sëgn é indere le Comun de Mareo ala pert, tëmp él ciamó a desposiziun, mo al n’é nia plü massa.  (Iaco Rigo)