La Usc di Ladins

Inier, en San Jan ai 27 de dezëmber 2020, püch dan les 8:00 da doman êl rové adalerch 145 porziuns de variores da Roma. La pröma porsona che á ciafé la variora é stada la coordinadëssa dla unité Covid Wilma Flunger, dedó ti ára toché a Enzo Acinapura de passa 80 agn y ince al imunologh plü conesciü de Südtirol Bernd Gänsbacher.
Dedó él gnü vaziné deplü colaboradësses y colaboradus sanitars, danter chisc la primaria Elke Maria Erbe (Repart Maraties Infetives), la primaria Elisabetta Pagani (Microbiologia y Virologia), la direturia dl Departimënt de Prevenziun Maria Grazia Zuccaro, la responsabla dl’Unité Epidemiologica Covid Annamaria Bassot, le responsabl dotur d’Emergënza Covid Marc Kaufmann, le vize responsabl dotur d’Emergënza Covid Patrick Franzoni, le primar Mario La Guardia (Pröm Aiüt da Balsan), le diretur dotur dl Ospedal da Balsan Flavio Girardi, le diretur sanitar dl’Aziënda Sanitara Pierpaolo Bertoli y la direturia tecnich-sanitara dl’Aziënda Sanitara Marianne Siller.

Le Presidënt dla Provinzia Arno Kompatscher á alzé fora le carater simbollich dl "de dla variora", ince ajache al é gnü tut ca impröma na infermiera y na porsona de tëmp dlungia a n espert scientifich. Al á recordé danü les prescriziuns y restriziuns cuntra l’espanjiun dl coronavirus (destanza, igiena dles mans y mascherot). Ma vare por vare gnaran fora de chësta situaziun, incö él naota n de de speranza – insciö Kompatscher.

Por l'Assessur provinzial Thomas Widmann él sté n momënt storich: "N de de partënza. Degügn de nos ne s’ess impensé da podëi pié ia cun la variora anti Covid–19 bele tl 2020."

Ince por le Diretur general dla Aziënda Sanitara Florian Zerzer rapresentëia la vazinaziun n "turning point“ por se paré dal virus. Al á rengrazié dötes les porsones che á daidé pro te döt le tëmp ala prevenziun y al combatimuent dl virus.

Degun festide – confermëia ince la Primaria dl Sorvisc de Microbiologia y virologia Elisabetta Pagani: "La variora à passé ia düc i controi rigorusc y é gnüda aproada dal’ EMA ('European Medicines Agency'), ci che cunta sambëgn tröp. Ince nos esperc nes ún informé tl detail, y la documentaziun scientifica confermëia che la variora é sigüda – iö instëssa m’á lascé vaziné incö." Important él, insciö Pagani, da se informé ma pro fontanes serioses y autorisades (p.ej. Robert-Koch-Institut RKI, Istitut alt de sanité ISS, European Center for Disease Control and prevention ECDC, World Health Organisation WHO) y da nia crëie ales fakenews: "Dantadöt söi socials ródel n gröm de notizies falades y tendenzioses. I dac scientifics publicá ofizialmënter desmostra la proteziun imunitara tl 95% di caji. Sce zacai á interes pól se aconsié pro la documentaziun dër trasparënta dla dita che à ciafé sö la variora." La dita a ce dla cooperaziun internazionala de chësta variora é la BioNTech da Mainz.

A vigni manira ciafa vigni porsona denanche ciafé la spriza les informaziuns avisa söla natöra dla variora y sön sü efec positifs – y ince eventualmënter negatifs.  (Iaco Rigo)