"Le DNA descrit tl rap n’é sigü nia chël di Scizeri d’La Pli"

Data

12 de jené 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Gran sciosciüre por n rap metü online dal comandant di scizeri dl Südtirol Jürgen Wirth Anderlan. Na "bravada" che ti á costé süa posiziun. Ince i Scizeri d’La Pli se destanziëia dal contegnü provocatif. "Iö sun dagnora sté cuntra la provocaziun", dij so comandant Michael Ploner
Le 2020 s’á stlüt jö por i scizeri cun bindebó de "böller". En San Salvester él jü online tres les plates dl Schützenbund le rap "Mamma Tirol". Na ciantia che á sciöche protagonist prinzipal rodunt le comandant dl SSB Jürgen Wirth Anderlan. Tl test dassënn patriotich vëgnel danter l’ater ince trat saites cuntra i omosessuai, al vëgn bagatelisé y trat tl ridicul la jonëza che i vá do a Greta Thunberg. Le test á atira alzé sö n gran stöp ti social y é gnü definí da plü perts "razist, omofob y sessist". Destanzié dal video ne s’á nia ma usc fora dla popolaziun, mo ince scizeri instësc, cina comandant y rapresentanc de raiun. Sciöche ara é söi social, é la discusciun baldi ince tosc rovada fora de control y é jüda defata sot le famojo ciol, cun ataches desprijëntes y manaciades, da sciöche an á aldí ince a sü familiars.
Wirth Anderlan l’á impröma porvada cun na iustificaziun, che n’é nia tomada sön de bun terac. Ala fin é le video sparí dal internet y le comandant dl SSB á messü damané la crëta tl diretif. La sentada é stada en vëndres dan otedé, cun le resultat che le comandant á fat n vare inzoruch y dé les dimiscuns tomperies. Sce le fin dl rap ê la provocaziun, spo él sté n gran suzes, mo ai scizeri instësc ne ti á Wirth Anderlan fat degun bun sorvisc. De chësta minunga é ince Michael Ploner, comandant di Scizeri d’La Pli. Ël cun süa compagnia se destanziëia dales perts provocatives dl test y pó ma ciugné le ce che al ti é tomé ite na te’ idea a n ël te chë posiziun.

La Usc: Michael, ci t’aste pa ponsé personalmënter canche t’as odü le video dl rap fat dal comandant provinzial Jürgen Wirth Anderlan y ci nen dijeste pa desco comandant di Scizeri d’La Pli?
Michael Ploner: I m’á atira damané co che al ess podü ti tomé ite na te’ cossa a n ël te süa posiziun. I sun romagnü spordü y dër desplajü. Iö pó ma dí che personalmënter chiri n ater modo de comunicaziun, che se basa sön le respet, por düc, belanfat de ci corú dla pel, dla religiun o orientamënt sessual. Iö tigni sön le dialogh. I oress sotrissé che i scizeri d’La Pli se destanziëia da dötes les perts provocantes dl test scrit da Anderlan y dal modo provocatif da comuniché. I pó ti assiguré ala jënt che le DNA descrit tl rap, n’é sigü nia chel di scizeri d’La Pli y gnanca dl SSB. I speri che chësc fat ne cacagnëies nia le bun raport che i s’án costruí te 40 agn de ativité, cun la jënt de nosc paisc y cun les uniuns.

T’La Usc di Ladins di 15 de jená ciafëise döta la intervista a Michael Ploner, olache al dij la süa sön les reaziuns ti social, sön co che al vëiga les dimisciuns de Wirth Anderlan y te ci che al vëiga la funziun di scizeri aldedaincö.  (Intervista: Pablo Palfrader)