La Usc di Ladins

Le 2020 é sté n ann particolar. Por döt le monn. Y insciö é ince stá particolars i complianns che i ún festejé tratan le 2020, Pasca é stada atramënter, les festes de dlijia é gnüdes tignides te na forma particolara y sambëgn é ince les gran Festes de Nadé y Nanü stades desfarëntes. Uniches. Chësc virus – tan pice – é sté bun da revoluzioné la vita dla popolaziun mondiala. Al n'é de chi che á messü lascé jí porsones amades a gauja dl virus, d'atri á pordü le laur; al n'é de chi che á messü dé sö süa ativité y ince chi ne sá nia plü co fá da jí inant. Mo al é un n pinsier che nes dëida inant te chësc tëmp cröde – le pinsier che i ne sun nia susc. Che la situaziun é la medema, plü o manco, por düc. Mo sambëgn, al n'é de chi che l'á paiada y la paia plü cera y an spera dassënn che ara vais – ince sce bel plan – da se trá fora de chësta situaziun, de chësc vire, che é tlafinada cuntra chëra che é la natöra dla porsona. Les porsones é fates por sozialisé, por sté deboriada, por se incunté y se abracé. Y canche an podará indô fá döt chësc, zënza tëmes y pisimes, iló sarál ciamó plü bel. Nos, redadus d'La Usc di Ladins, ti ún damané a nüsc leturs sciöche ai á passé les Festes, sciöche ai á viü iniann Nadé y Nanü.

Ci che ai nes á respognü podëise lí tla ediziun stampada da en vëndres ai 22 de jená.   (kp)