La Usc di Ladins

Al é tres plü porsones che tëgn sön n’alimentaziun sana, che ciara da olache i produc vëgn y spënn ince ion val’ euro deplü por avëi o por sorví sön mësa spëisa che vëgn da zidlamënc o coltivaziuns biologiches. Ares ti dá valüta ala naturalité dl produt, mo ince ales carateristiches ideales incër la sconanza dl ambiënt y les condiziuns de laur. De chësc vers vá ince le proiet "Urt da Ras" a Al Plan de Mareo, olache al vëgn coltivé verzöres y erbes de vigni sort y corú.
Iniziadú dl "Urt da Ras" é Georg Trebo d’Al Plan. Do 5 agn che al á albü n gran urt a Barbian, s’ára porté pro che al messâ chirí n terac nü y en chësc iade orôl tó ite tl proiet ince valgügn compagns. Garatada ésera cun Gabriel Oberhuber da Vahrn, che á ince porté para süa chestiana Barbara Egger da Niederdorf.
A Al Plan é i trëi coltivadus rová plülere por caje. Ion s’essi lascé jö fora en Puster, olache les condiziuns climatiches impormët forsc da coltivé deplü y plü saurí, mo ara n’á nia orü ester. Insciö án messü se ciaré incërch altró. Ala fin ésera garatada sön le Lü de Cassl, a 1.250 metri tla localité "Ras" a Al Plan. Sce an se fej sëgn na spazierada tla bela contrada da Ras, pón ma se fá morvëia da odëi ci che i trëi compagns é stá bugn da fá adinfora.

I sun jüs a ciafé i trëi coltivadus. T’La Usc di Ladins di 20 d’agost podëise lí plü avisa ci che ai coltivëia y ci filosofia che stá do ia.  (pablo)