La Usc di Ladins

La Diozeja de Balsan/Porsenú á mené fora les mudaziuns che gnará a s’l dé cun le 1. de setëmber.
Öna che nes atoca plü davijin é bëgn chëra dla cöra da La Ila, olache siur Iaco Ploner s’un vá sciöche curat. Al vëgn deslié da süa inciaria mo daidará ciamó fora "tla pastorala tles vijinanzes da Porsenú", sciöche al é scrit tl comunicat. Plü avisa jará siur Iaco a d’abité tl Seminar da Porsenú, sciöche siur Degan Iaco Willeit nes dij, y daidará spo fora olache al vá debojëgn. Siur Iaco â bele arjunt la eté dla "ponsiun" da prou y á insciö tut la dezijiun da jí demez. Desplajëi desmostra ince siur Degan, che é ofizialmënter ploan da La Ila y fistidiará ince inant te sües poscibilités. Te calonia a La Ila ne rovarál indere nia n ater curat.
Dlungia la mudaziun de siur Iaco, él ince chëra de siur Tone Fiung, che vëgn deslié da süa inciaria da assistënt spiritual dl "Katholischer Familienverband Südtirol", sciöche ince siur Pire Clara, che vëgn deslié dala inciaria da curat tla Unité Pastorala de Gherdëina y siur Alois Pitscheider, che vëgn deslié dala inciaria da ploan de Santa Cristina. Danter les nominaziuns, ciafunse spo chëra de siur Pire Irsara, che ciafa lapró ince la cöra da Weitental y Pfunders, y nia inultima Pauli Rigo da La Pli, che vëgn nominé por 5 agn implü sciöche responsabl dl istitut (tod. "Heim") dl Vinzentinum.  (pablo)