La Usc di Ladins

Ai 7 de ma de en chësc ann á le Comun de Badia invié ia le QuizClima, na iniziativa che é jüda inant por 12 edemes, metüda da jí tl cheder dl program ComunClima, de chël che le Comun de Badia fej pert dal 2017 incá. Vigni vëndres él gnü publiché sön la plata internet dl comun n consëi por n comportamënt sostenibl y na domanda dl quiz. Ales domandes podôn respogne online y tlafinada éres gnüdes valutades dal Team Energia. Indöt él sté 160 porsones che á tut pert al jüch a pesć; i inoms di 99 candidac che á dé les respostes dërtes é gnüs metüs te na ola dla fortüna y al é gnü trat fora le davagnadú, che á ciafé na Museomobil Card por döta la familia. Le plü fortuné é sté Thomas Pezzedi, a chël che l'ombolt Iaco Frenademetz, adöm cun la Junta de Comun, ti á surandé le pest ai 1. de setëmber.

Te chësta pert dl program dl Comun Clima, s’á le Team Energia, deboriada cun la consulënta por le ComunClima Sonja Abrate dl Ökoinstitut Südtirol/Alto Adige, dé jö dantadöt cun le tema comunicaziun y sensibilisaziun. Porchël él ince da ciafé deplü relaziuns ti media a stampa y online dl Comun. N punt important é danter l’ater stada l’ediziun speziala dl EHO sön le tema „Sconanza dl clima“, dada fora de jügn 2021. Por contrasté l'emergënza climatica, che toca ince nostes realtés, unse de bojëgn da lauré düc adüm meton man suradöt cun la sensibilisaziun y l’informaziun sön les tematiches liades ala sconanza de nosta Uma Tera. Tres de pici vari, sarunse bügn da fá tröp.


Les dodesc domandes dl quiz cun les respostes podëise lí tla ediziun stampada da en vëndres ai 17 de setëmber.   (kp)