La Usc di Ladins

I EuroSkills é i campionac europeics dl artjanat, che é stá la findledema da denant, dai 22 ai 26 de setëmber a Graz. Südtirol ê ince indô ala pert cun 7 concorënc, adöm cun le Piemont che n'â 5. Tla scuadra dl Südirol êl ince le depenjadú y decoradú da La Val, Dominik Miribung, che â bele tut pert ai WorldSkills dl 2019 a Kazan. Te trames döes les ediziuns s'á alzé fora l'artejan badiot, podon pié do le diplom de ezelënza. La delegaziun dl Südtirol á ciamó podü pié do döes medaies: na medaia d'arjënt por la friseria Lisa Marie Winding y öna de brom por le muradú Simon Oberhauser.

Dominik Miribung, che laora sciöche depenjadú y decoradú tla firma de familia, Farbdesign 2000, â bele fat para pro i WorldSkills, competiziun che tol ite artejans da döt le monn, stá dan dui agn a Kazan y ince iló ti êl gnü surandé le diplom de ezelënza tla categoria di depenjadus y lacadus. I s'ún metü en contat impara y ti ún fat n valgönes domandes:

La Usc: Dominik, bele dan dui agn âste fat para pro i WorldSkills dl artejanat a Kazan. En chëst'ann este jü a Graz a fá i EuroSkills. Co éra pa jüda?
Dominik Miribung: Dan dui agn a Kazan m'âl salpü dër bel y canche i organisadus dla LVH (organisaziun di artejans, ndr) m'á damané sce i essi orü fá para ince pro i EuroSkills ái atira dit de sce. Ara é jüda dër bun, i á ciafé 703 punc i á indô podü pié do n diplom.

Co t'aste pa arjigné ca por i campionac?
I m'á eserzité dër tröp, dantadöt ti ultims dui mëisc, vigni findledema y spo ince da sëra, do le laur.

Ci aste pa plü avisa messü depënje y ves gnôl bele dit danfora ci sort de laurs che i esses messü fá?
Le dessëgn che i esson messü realisé nes é bele gnü dé danfora, mo i savôn che al ess podü mudé. Tratan chisc campionac vëgnel ghiré dai partezipanc che ai fejes laurs dër avisa, al vëgn ciaré a vigni detail, döt mëss ester perfet. I laurs vëgn partis sö te trëi modui: pro le pröm él sté da tapezé, pro le secundo da laché na porta y da realisé n dessëgn – en chësta ota le ciampaní da Graz – olache al é ince gnü damané da moscedé dui corusc, n scür y n lominus y da fá na bela sfomadöra. Implü êl ciamó da fá n dessëgn lëde, iló ái iö realisé le blasun da Graz y spo êl ciamó na pert olache al vëgn tut jö le tëmp.

T'as bele afronté na te'competiziun dan dui agn. Co ê pa le livel di aversars?
I mëssi di che en chësta ota me savô le livel di aversars ciamó plü alt co pro i WorldSkills. Ai ê düc dër bugn.

Impröma a Kazan y sëgn a Graz. Ci te dá pa personalmënter y profescionalmënter chëstes esperiënzes?
Por me él esperiënzes dër importantes che me dá la poscibilité da conësce porsones nöies y da odëi sciöche al vëgn lauré te d'atri posć.

I proscimi WorldSkills sará dl 2022 a Shanghai. Oresseste fá para?
Eh, al me savess dër bel, mo baldi ne podarái nia jí, deache an pó ma fá para un n iade pro i WorldSkills y un n iade pro i EuroSkills. Iö á albü la fortüna da podëi tó pert a tramesdöes les competiziuns.  (kp)