La Usc di Ladins

Te Ciasa de Palsa a San Martin de Tor viron al momënt na situaziun dër critica, o cinamai »dramatica«, por tó ca les parores dl presidënt Giovanni Mischí. Ai 15 d’otober vá en forza l’oblianza da avëi le green pass por jí söl post de laur y por le personal sanitar él de oblianza da avëi la variora. Na oblianza che podess dé jö sciöche n tarlí te Ciasa de Palsa da San Martin de Tor, olache an á incër 20 colaboradësses che n’ó nia se lascé fá la variora y é desponüdes da lascé le post de laur por chësta süa convinziun. Te Ciasa de Palsa da San Martin ne vëgnel n iade gnanca plü fat plans de laur, deache an ne sá nia sön tan de forzes che an pó cunté. An s’orga­nisëia edema por edema. Le presidënt Giovanni Mischí n’ascogn nia che la situaziun é pesocia, y che ara sforzará da dé sö sorvisc. Al vëgn baié da stlü le repart demënza y ara pó cinamai rové tan inant che an mëss mené a ciasa berbesc y mëdes, deache an n’é nia plü bugn da garantí le sorvisc. "Degügn ne s’imaginâ da messëi rové a val’ de te’", dij le presidënt Mischí.

Deplü sön chësta situaziun precara y ci che presidënt y vizediretur dij dla situaziun, podëise lí t’La Usc di Ladins di 8 d’otober

 (pablo)