La Usc di Ladins

En ocajiun dla sentada dla Uniun di Ostis-Hgv de Badia, le mertesc ai 28 de setëmber, á Marina Rubatscher Crazzolara lascé al savëi che ara ne s'ess nia plü metü a desposiziun y s'á insciö trat zoruch dala inciaria da surastanta dal Lia a livel de valada. Impó laurará inant la ostira tl setur turistich, fajon tres ciamó pert dl consëi de aministraziun de “Vitalpin”, che se crüzia dla promoziun dl turism tl raiun dles Alpes; ara restará inant a ce dl Consëi por la promoziun dles ëres tl'imprenditoria y portará tres d'atri proiec, danterater “Frühstück in Südtirol”. Gran desplajëi da pert di ostis de Badia, che á tut la ocajiun dla sentada por la rengrazié de ci che ara á fat y arjunt tratan i 8 agn a ce dla Uniun, se don dagnora dër tröp da fá por porté inant i interesc di ostis, en particolar tl Consëi provinzial dla Hgv.

Sü pinsiers y sües impresciuns sön le turism da sëgn y dl dagní te na intervista che i podëis lí tla ediziun stampada d'La Usc che vëgn fora incö, vëndres ai 8 de otober.  (kp)