La Usc di Ladins

A Pulma – na picia biscia coriosa y n pü’ sbira – ti sál dër bel da fá corëtes y salté incërch, da mangé les fëies beles frësches, ciamó da rosada, sön pre da doman y da ti ciaré al bel Sas dla Crusc imponënt sot n lersc a d’ambria dlungia le Lech de Valacia. Propi da chësc bel post pëiera ia sön so iade fora por le monn por descurí n gran tesur.

Cun chëstes prömes impresciuns y imajes se á les trëi studëntes Noemi Dapunt, Sophie Mangutsch y Lucia Piccolruaz senté adöm dan da n vidrel dl computer tratan la carantena l’ann passé da d’aisciöda. La storia de Pulma proa da splighé na cossa, a pröma odüda dër scëmpla y tlera, mo che vëgn tres danü desmentiada, nia conscidrada o cinamai stlüta fora cun iudizi che an fej zënza ponsé. "Vignun y vignöna de nos á n cufer de carateristiches y de valurs che pó se desfarenzié l’un cun l’ater – sce an le deura sö y le partësc, ne vá chisc valurs nia a perde mo arichësc la manira da odëi y vire la vita", spliga les auturies.

Deplü sön le liber podëise ciafé tl Ciantun dla Uniun Ladins Val Badia, t’La Usc di Ladins di 18 de merz. "Pulma descür n tesur" gnará presenté ai 25 de merz dales 16:00 tl salf dl Istitut Ladin Micura de Rü dales 16 cun n’ora de intratenimënt, letöra y pastlené por pici. I posć é limitá: prenotaziuns a info@uniunladins.it. Al vel les normes d’azes cun super green pass.