La Usc di Ladins

La Usc: Co éra pa gnüda a se l dé che i ëis surantut la rejia dl teater musical »Ujöp da Oies«?
Bernardetta Nagler: I sun gnüdes damanades y i mëssi di che tl pröm âi val' dübe sön la tematica, mo spo ái metü man da me dé jö cun Sant Ujöp y i me á intenü ci personalité interessanta che al â, che i valurs che al partî se liëia a nosta vita d'aldedaincö y che les tematiches y contignüs che vëgn dant te süa vita é dër contemporanns.

La Usc: Co se ëise pa arjigné da surantó la rejia de chësta opera?
Valentina Kastlunger: La pröma idea ê chëra da surantó n musical che ê gnü realisé ia tla Cina, olache la pert sön la vita de Ujöp a Oies ê indere dër marginala y porchël él gnü tut la dezijiun da pié ia da zero. I se un arjigné adöm cun Carlo Suani, che á scrit le libret dl'opera. Ujöp ne unse nos nia conesciü, porchël unse rapresenté na porsona che i un imparé da conësce tres i libri y tres les lëtres che al ti scriô a süa familia. I un alzé fora süa umanité, sües cualités, sü dübi y dificoltés da se confronté cun na cultura y na situaziun che al ne conesciô nia, te n post olache degügn ladins ne ê mai stá. Süa capazité da se avijiné a na cultura desfarënta, da se daurí al ater unse insicö metü tl zënter dl teater y al é le messaje plü important che i orun trasmëte impara.

I podëis lí inant l'intervista tla ediziun stampada d'La Usc da en vëndres ai 8 de messé.   (kp)