La Usc di Ladins

Do n ann 2022 indô plëgn de ativités, tröpes fadies y sodesfaziuns por la Müjiga da La Ila, él gnü metü da jí na jita de trëi dis a Stuttgart. Bele da trëi agn n’â la uniun nia podü jí en jita a gauja dla pandemia, y porchël á le consëi orü organisé n bel program por sté indô n iade deboriada y s’la lascé jí bona, sciöche picera reconescënza ai mëmbri dla musiga.
Por na uniun sciöche la musiga de n paisc é le bun clima danter i musicontri y düc i mëmbri dër important. Tratan döt l’ann vëgnel soné deboriada, tigní tröpes proes y conzerc. N apuntamënt dër aspeté é spo sambëgn la jita. En chësc ann á passé la Müjiga da La Ila n valgügn dis da fin de aurí al mëteman de ma a Stuttgart. Piá ia éson la sabeda ai 29 de aurí cun le bus da La Ila bele dales 5:00 da doman, por jí dlvers dla Germania. Pornanche rová te Stuttgart, do na bona marëna tl paisc de Neuhausen auf den Fildern, á la musiga tut pert a na vijita interessanta dla cité cun na guida dl post, che s’á trat fora por döt le domisdé. Por stlü jö le pröm de él sté düc che á cené deboriada tl zënter dla cité, por spo podëi se gode lëdiamënter la sëra. 

Liede inant deplü tla ediziun nöia stampada de La Usc di Ladins!