La Usc di Ladins

Sön la Strada Provinziala 43, danter Longega y le ju de Furcia, éson tl laur da rofá i mürs de strada. “A chësta moda portunse ite plü segurëza y se parun dai danns di temporai”, dij l’assessur provinzial Daniel Alfreider.
Sön inciaria y sot la direziun dl Sorvisc Strades vëgnel fat sö mürs nüs te plü posć dla Strada Provinziala n° 43 danter Longega y le Ju de Furcia. Chësc, por garantí na majera segurté.
“Ara vá debojëgn de chisc intervënc a gauja di danns dai temporai di ultims mëisc. I messun aumenté la resistënza de nostes strades y garantí inant la segurëza de chi che vá sön strada”, dij l’assessur provinzial por la mobilité y les infrastrotöres Daniel Alfreider. I danns provocá dal burt tëmp desmostra che an mëss tres indô intervení. “Te chisc posć gnêl gonot fora problems, cis do temporai y agajuns. Cun chisc laurs ciarunse da sistemé i posć plü prigorusc” dij inant l’assessur. Al momënt él trëi cantiers daverc: danter le km 12+700 y le km 13+500, y danter le km 16+800 y km 23+700: alache ara vá vëgn i mürs vedli metüs a post, scenó vëgnel fat sö mürs nüs, cun lapró le socl por le clander. Al vëgn trat jö i vedli mürs en malester, spo vëgnel fat sö i mürs de contenimënt, cun petun y fer, y dessura ciamó le socl de petun y le clander. Danter le km 12+200 y le km 12+700 pon jö le Sorvisc Strades l’asfalt nü.
Klaus Kaneider, vizediretur dl Sorvisc Strades dla Val de Puster, spliga che l’asfalt vedl gnará crazé demez cun la fresa y livelé cun le menadl. I laurs vëgn fac dales dites Niederwieser Bau Gmbh, Wipptaler Bau - Klapfer Bau y da Kofler & Rech AG.
I cosć por düc trëi i intervënc é de 1.873.444,000 euro. An é spo tl laur da proieté n ater intervënt por mëte en segurëza le toch de strada danter le km 14+850 y le km 15+100 söl Ju de Furcia – insciö Klaus Kaneider.