La Usc di Ladins

L’alarm por i Stödafüs d’Al Plan é gnü mené fora dales 7:16 da doman, por n inzidënt sozedü tla localité Framacia, danter Longega y Al Plan. Do l’intervënt á le comandant di Stödafüs Christian Rindler ma püces parores: "Les porsones á albü na fortüna mata cun n gröm d’agnui custodi". Ci êl pa sozedü. Le comandant spliga inant che na ëra che gnô söpert cun la möta t’auto, á albü n colp de sonn y é rovada fora de strada. Ara é arentada y spo rovada sura le guardrail fora y le meso é arsí tl Rü d’Al Plan. Le post ne n’ê nia tan saurí da odëi sce an ne mët propi averda, mo por gran fortüna é les döes porsones stades bunes da gní instësses fora d’auto y se porté sö pormez a strada, olache ares é gnüdes odüdes y olache jënt á spo ince cherdé i socursc. Söl post él rové 15 omi di Stödafüs y valgügn é stá a desposiziun te magazin. Inant él rové alerch i Carabiniers dla staziun da La Ila, sciöche ince la Crusc Blancia Mareo, che s’un á spo tut sura dles porsones. La spordüda por ëres é sambëgn stada grana, ferides pêl che al ne sides nia de maius. Impó éseres gnüdes condütes por n control te ospedal. A d’ëres döt le bun.  (pablo)