La Usc di Ladins

N lere splundra ite te na banca cun na pistola tla man, mo incunta cassiers y cliënc demorvëia, tan che al mëss cinamai ël impormëte ia scioldi; n ghest te restorant ne vëgn nia pro da mangé y perd i nerfs deache la chelnera y sü "vijins de mësa" ne le lascia scemplamënter nia mëte man da mangé; na comisciun litala vëgn dales paziënzes deache al röia alerch i litadus plü strambi, incompri y demorvëia. Chëstes é ma trëi situaziuns che vëgn portades sön paladina dala Uniun Teater La Ila, pro le toch "Indô (ma) scenes". Sciöche l’inom dij bele, él na suzesciun de plü scenes y situaziuns desvalies, che pîta na buna ora de devertimënt y aurela cörta. Do les prömes rapresentaziuns la sabeda y domënia passada, vëgn i toc ciamó presentá en mercui ai 8 de novëmber dales 20:30, tla Ciasa dla cultura a La Ila. Sön paladina él da odëi Alessandro Bonfanti, Jessica Flöss, Marco Moscon, Milena Obwegs, Andreas Peccei, Andy Pizzinini, Roland Pizzinini, Roberta Rinna, Sabine Rudiferia y Susann Tavella. La regia é tles mans de Erika Castlunger y dles löms fistidiëia Luca Pizzinini. L’entrada é debann y an n’á nia bria da s’anunzié.

Chiló ciafëise valgünes impresciuns fotografiches. Sön le teater instës podëise lí deplü t’La Usc di Ladins di 10 de novëmber  (pablo)