La Usc di Ladins

Dal vangele do san Mateo 25, 31 – 46

Te chël tëmp á Gejú dit a sü discepui: »Canche le Fi dl Om vëgn te süa gloria y düc i agnui cun ël, se sentarál söl tronn de süa gloria. Y düc i popui gnará cherdá adöm dan da d’ël, y ël i cernará indalater, sciöche le famëi cern les bisces dai moc. Al abinará les bisces a süa man dërta, i moc indere a süa man ciampa. Dailó ti dijará le re a chi a süa man dërta: Gnide ca, os benedis da mi Pere, tolede le rëgn, che é destiné por os dala creaziun dl monn incá. Deach’i â fan, y i m’ëis dé da mangé; i â sëi, y i m’ëis dé da bëre; i ê forest y zënza tët, y i m’ëis dé alberch; i ê desnü, y i m’ëis vistí; i ê amaré, y i sëis gnüs a me ciafé; i ê te porjun, y i sëis gnüs da me. Spo ti respognará i iüsć: Signur, can t’unse pa odü arfamé y t’un dé da mangé o asseté y t’un dé da bëre? Y can t’unse pa odü forest y zënza ciasa y t’un tut sö, o desnü y t’un vistí? Y can t’unse pa odü amaré o te porjun y sun gnüs da te? Sön chëra ti respognará le re: Amen, i ves diji: Vigni ota ch’i ëis fat chëstes cosses ince ma a un su de chisc mi mëndri fredesc, les ëise fat a me. Spo s’ojaral ince pormez a chi a man ciampa y ti dijará: Demez da me, os maledis, tl füch etern, che é destiné por le malan y sü agnui. Deache i â fan, y os ne m’ëis nia dé da mangé; i â sëi, y os ne m’ëis nia dé da bëre; i ê forest y zënza tët, y os ne m’ëis nia dé alberch; i ê desnü, y os ne m’ëis nia vistí; i ê amaré y te porjun, y os ne sëis nia gnüs a me ciafé. Spo respognarai ince ëi: Signur, can t’unse pa odü arfamé o asseté o zënza tët o desnü o amaré o te porjun y ne t’un nia daidé? Sön chëra ti respognaral: Amen, i ves diji: Vigni ota ch’i n’ëis nia fat chëstes cosses a un su de chisc mëndri, ne les ëise nia fates a me. Y ai s’un jará demez y ai ciafará le castighe etern, i iüsć indere la vita eterna.«

Parora dl Signur. – Lalt a te, Gejú Crist!