La Usc di Ladins

Le raiun de Plan de Corones é feter "da tradiziun" le pröm raiun dai schi tles valades ladines dl Südtirol che deura les portes. Insciö ésera stada ince chësc ann. Do edemes olache le gran frëit é pordërt sté fora, ésera impó garatada en sabeda dan otedé da daurí les prömes pistes. Puntualmënter ai 25 de novëmber s’á na bela cumpëda de schiadus metü sön tru devers la munt dai schi, olache al é gnü daurí le 40% dles pistes y le 64% di implanc dl comprensor. D’Al Plan sö án ince arjigné na bela striara dla pista "Miara", che pormetô insciö da raité cina jö te paisc. Deache la "Col Toron" ê indere ciamó stlüta, án impó daurí l’implant por podëi garantí le coliamënt cun Furcia, olache an podô busié jö por les pistes Pre da Peres, Rara, Costa, y da Plan de Corones jö por la Furcia nr. 9. Ince i pustri á fat süa pert, daurin zacotan de implanc y pistes, insciö che i schiadus plü despaziënc á albü na bela lîta por pié ia. Chi dis y i dis do é spo ince les temperatöres jüdes zoruch, insciö che i canuns á podü spodé ince ia por le de. Insciö deura sön Plan de Corones ai 29 de novëmber zacotan de pistes lapró. La nëi de canun é fondamentala por avëi döt davert canche al gnará la pröma ona de ghesć sura le punt de Santa Maria Imacolada. Puntualmënter por dailó, plü avisa cun i 5 de dezëmber, dauriará spo ince implanc y pistes dl’Alta Badia.  (pablo)