La Usc di Ladins

Le surastant dl raiun de Puster/Val Badia tla Uniun di Paurs de Südtirol ("Südtiroler Bauernbund") Anton Tschurtschenthaler á daurí la reuniun anuala tl NOI–Park a Bornech ciaran derevers al ann che vá a piz, che é sté – sciöche ël dij – n bun ann por le pramí, por le tëmp, por la produziun de lat y ince por la cern d’armënt. Le prisc dl lat y dla cern á podü s’alzé generalmënter tl Südtirol y la tendënza che i prisc restes adaldërt por le laur pó jí inant. Le surastant raional á trat ca l’aspet dles mascinns por le laur da paur, recordan che adoré mascinns massives y ceres "ma" chës 100 ores al ann n’é nia da aconsié y trá dant ala compartezipaziun te n grup de patruns, p.ej. le "Maschinenring".
Aladô de Tschurtschenthaler, á l’arlogn atoché dantadöt Puster y la Val Badia, y le problem restará inant. Al ti fej l’apel ala politica locala y provinziala, da ciaré da lité planns y proiec de frabicac de lëgn al post de palac de petun y zemënt, Tschurtschenthaler: "Sce i ti ciarun a chësc frabicta nü y modern dl NOI, ne odunse püch y degun lignan, y chësc é dër da paronté y ne acorda nia cun la sostenibilité tan anunziada y orüda dala gran politica."
N paragraf dl intervënt ti é ince jü ala problematica dl lu, che ne manacia nia ma le laur da paur söi lüsc y tles munts, mo devënta n problem ince por le tëmp lëde y le turism.
Aladô de Anton Tschurtschenthaler, dëida l’Uniun di Paurs le paur y les families da paur, mo la burocrazia n’é dessigü nia d’aiüt y arfera sides le paur co les pratiches do autorisaziuns y le finanziamënt de intervënc. Le fotovoltaich foss na bona investiziun söl lüch, insciö Tschurtschenthaler, mo al é ciamó da desgropé les restriziuns politich–aministratives por l’istalaziun söi pra o te areai demez dales frabiches. N ater punt ciamó davert é la poscibilité da lascé arsí campers söi lüsc da paur, ince de chësc vers se dará da fá l’Uniun di Paurs tl proscim dagní.
N moto tres atual é "lauré i lüsc por i mantigní", porchël él da mené do ativités rentables söl lüch, ince alternativamënter a jí cun le lat. "Al é n gröm de poscibilités d’ativité", dij Anton Tschurtschenthaler, al cunta dl agriturism, dl zidlamënt de tiers nia da muje… de coltivaziun de ortam, yii. Lapró vëghel tl artejanat söl lüch da paur de bones chances: lauré da zumpradú, tistler, lauré de lignan, fá scianores, coni da si, yii.

Liede do deplü tla ediziun nöia de La Usc di Ladins da indoman jöbia!