La Usc di Ladins

Do i 4 musicals "Picio Muck", "Ariel - danter tera y mer", "Cater da coraje" y "Peter Pan - en jore de soms", garetel en chësc ann "Chë picia stria", n musical scrit da Barbara Rottensteiner Comploi, do la storia "Die kleine Hexe" de Otfried Preußler. Al é la Uniun Ladins Val Badia che á tut tles mans le proiet y chirí fora án chësc toch, ajache al é n classich dla leteratöra por mituns, che cunta na storia afascinanta, cun na figöra d’identificaziun feminila y trata na tematica atuala. Bëgn 30 – 28 mitans y 2 mituns – é jobleres y jobleri che mostra so förtl sön paladina, por n spetacul che scinca tröpes emoziuns. Al é n musical porí ladin, pón dí: Ladines é les coordinadësses, ladines y ladins é aturies y aturs sön paladina y ladins é ince i auturs y componisć dles 12 cianties che vëgn portades dant tratan la storia. I sforc da porté sön paladina le musical é gnüs premiá dal gran interes y aprijamënt dl publich. Döt plëgn êl en vëndres sëra te salf dles manifestaziuns d’Al Plan por la gran premiera, y döt plëgn él por la ultima rapresentaziun en domënia dales 17:00. Ma plü püc posć (en pe) él por les döes rapresentaziuns da incö sabeda ai 9 de dezëmber dales 14:00 y dales 19:00. Chi che ó ciamó nen abiné un, dess se spazé y jí sön www.musicalalplan.com . Por ci che reverda mia esperiënza personala, pói ma dí: al paia la mëia!  (pablo)