La Usc di Ladins

La vita religiosa te nüsc paisc vëgn arichida da n gröm de festes, rituai y tradiziuns, che dá zacó le tach fora por l’ann. Tles edemes passades unse albü les festes d’Les Antlés y dl Cör de Gejú, caraterisades dales gran prozesciuns eucaristiches cun statues, bandires y confaruns. Te Mareo tomel ite na festa tla festa, che vëgn recordada te na forma scëmpla y plü tl chît. I baiun d’Les Antlés da Mantëna. Sciöche l’inom dij bele, reverda chësta festa scialdi la picia fraziun da Mantëna, püch denant che rové sö Al Plan. Mantëna é na fraziun che é chersciüda sön ur dl Rü d’Al Plan, na ega che alimentâ dandaía cotan de morins y ativités. L’ega ê indere ince fontana de prighi, canche le tëmp gnô rî, les eghes se slunfâ y jô forsc porsura. De gran rogossies él sté dl 1937, spo ince dl 1966, mo ince d’agost dl 2022 él raité jö eghes y paltans cina pormez a val’ ciases.
Rodunt ince por chësc fin vëgnel tigní Les Antlés da Mantëna.
Tan vedla che la festa é, ne sán nia cun segurté. Tl liber "Mantëna/Montal" scrí Lois Ellecosta, che an pó feter araté che ara sides gnüda tignida le pröm iade dl 1896, canche al ê gnü benedí la capela da Mantëna restaurada, y che ara foss gnüda revitalisada do les rogossies dl 1937 por perié do sconanza dal rî tëmp. L’autur scrí inant che "a vigni moda vëgnera tignida vigni ann dala secunda vera incá". Dandaía gnôra tignida la jöbia d’Les Antlés, cina che la festa ê ciamó ia por l’edema. Dedô ésera gnüda spostada ala domënia sëra, olache la jënt â indere bele albü la prozesciun danmisdé te paisc. I ultims per d’agn l’án tignida la sabeda do la mëssa prefestia. Iló se mët n grup sön tru en prozesciun por jí jö cuntra Mantëna. Dlungia la ciasa da Roâlta aspeta i abitanc dla vila cun le confarun y la statua, che rafigurëia intrami San Ví y acompagnëia i pelegrins cina ala pröma staziun.

Deplü podëise lí t’La Usc di Ladins di 4 de messé  (pablo)