La Usc di Ladins

Le Sas dla Crusc, la Cronica dla Val Badia, é zënzater öna de chës publicaziuns che tröpa jënt aspeta ert. N gröm é coriusc y lii ion ci che al é sozedü tla vita de so paisc y forsc di paisc vijins. Chësc án odü ince en chësc ann: al é püch plü co dui mëisc che la Uniun Ladins Val Badia á metü man da condüje la cronica 2023 fora por les ciases y sciöche al é n pü’ tradiziun, á la Uniun cherdé adöm cronistes y cronisć, sciöche ince colaboradus por le letorat, impaginaziun y venüda dla publicaziun, por na incuntada olache al é gnü fat n resocunt dl laur, y chël é tomé fora dër positif.
Chi che cumpra regolarmënter le Sas dla Crusc, sá che al é n liber che é gnü cun le tëmp tres plü gros. Y ince chël dl 2023 á n valgönes zifres che fej süa parüda. Les cronistes y i cronisć dla valada é stá bugn da mëte adöm na cronica de 672 plates, olache an ciafa la belëza de 1.163 fotografies. Sce valgügn ó la savëi ciamó plü avisa, spo él gnü scrit bëgn 169.795 parores, che ó dí 870.456 batüdes.
Pro la incuntada ti él ince gnü surandé na onoranza a Karin Clara da Lungiarü, che dá jö la inciaria da scrí la cronica, do 17 agn de sorvisc.

Deplü sön la incuntada podëise lí y odëi t’La Usc di Ladins di 16 d’agost  (pablo)