La Usc di Ladins

La cooperativa Por Mareo, metüda sö dan da n ann za. tres le proiet PNRR "La Pli, n tesur da descurí", á desco compit chël da mioré la cualité de vita de nosta jënt, ciaré dl teritore y pité sorvisc ala comunité. La Coop pó se cruzié de n gröm de laurs, scüfs y sorvisc, y é n partner important por la man publica. Te chësc ambit á la "Por Mareo" ince surantut laurs desvalis sön inciaria dl Comun de Mareo. Ara se trata chiló de na colaboraziun por mioré le sorvisc y mantigní les infrastrotöres y le teritore dl comun de Mareo. Cun na convenziun anter la "Por Mareo Coop" y le Comun, á chisc laurs podü gní surandá.

Cun le 2025 á spo la Coop podü pié do chisc sorvisc. Cun l’aisciöda 2025 á la cooperativa surantut le laur da sié incër les strades comunales. Le Comun de Mareo á incër 100 km de strades comunales y porchël é la manutenziun ordinara n gran laur. Adöm ai lauranc de Comun él gnü fat n plan de laur y insciö á trëi mëmbri dla "Por Mareo" surantut l’impëgn da sié, en pert a man, en pert cun la falc a motor. Por la fin de jügn él bele sté scialdi döt sié. La jënt dl post é stada contënta dl sorvisc che la Coop á fat.

Deplü sön l’ativité y i proiec dla Coop, podëise lí t’La Usc di Ladins di 22 d’agost