La Usc di Ladins

N de sciöche memorandum por döt l'ann! Na festa olache an ne scinca nia ma mimoses y ciuchelada, mo olache an dess se recordé na parité che döra döt l'ann.

En chësta domënia vëgnel festejé le de dles ëres. Na festa che é gnüda metüda sö bele dan cënt agn, y te chësc tëmp á les ëres cun tröpa forza y coraje combatü y davagné tröpes batalies por porté le genus feminil al medemo livel de chël maschil.
I viun te na cultura che porta sön les sciables, prësc da tres, n sistem patriarcal, mudé les regoles che vëgn da tröc agn conscidrades naturales n'é nia sté y n'é gnanca sëgn saurí. Tröc dërc, da chël da podëi lité a chël da avëi na proprieté y ne ester instësses nia de proprieté, ne vëgn aldedaincö, chiló da nos, nia plü metüs en discusciun, i i ciafun inraijá te nosta sozieté. Impó él fondamental da festejé y se recordé de chësc de 8 de merz, che n'é nia ma na festa olache al vëgn scinché ciuchelada y mimoses, mo na ocajiun por tigní a mënt la parité che vëgn ciamó sëgn datrai trascurada o desmentiada.
Les fondamëntes por costruí le pinsier, de ci che ester ëres ó dí, é te chisc 100 agn gnüdes restrotorades dassënn. Inlaota suzedôl che al gnô dit canche al nasciô na picia möta: »Püra creatöra, chësta ará tröp da patí tla vita«. Da chësc pinsier se unse te nosta cultura y te nostes naziuns ozidentales por fortüna destaché, impó messunse aldí gonot notizies brutales olache la sora colpa é chëra da ester ëra.
Ciarun da nia plü nes lascé dí dala sozieté ci che an dess fá o sciöche an dess ester, mo da svilupé la cosciënza da podëi ester insciö sciöche i sun y orun ester, respetan la liberté de dötes les porsones! Ester lëdies y nia tacades a morones plënes de preiudizi. Na forma prezisa de sciöche na ëra mëss ester ne esistel por fortüna nia, y sciöche düc, ince nos, sun dötes atramënter.
Sciöche bele Shakespeare scriô dan 400 agn: l'ëra n'é nia nasciüda dal ce por ester val' deplü, nia dai pisc por ester pestada sot, mo dai costëis por ester medema y insciö amada. Tolun ca chësc de por sotrissé nosc valur, y por jí inant te ci che al é gnü costruí, acioche an pois n bel de te döt le monn veramënter arjunje n livel de parité!  (de Lucia Piccolruaz)