La Usc di Ladins

L revèrda proponetes operatives per l’aspet sanitarie, turistich e sozièl l document manà fora enstadì dal grop de mendranza de Comun de Moena »N projet per Moena« per ge domanèr a la Jonta na lingia de intervenc da fèr sul teritorie e per i sentadins.

L document ge é stat manà ence ai raprejentanc de la desvaliva categorìes del paìsc ajache se trata de proponetes che era states condividues ti gropes de lurier ma che amò - disc i conseieres de mendranza - no é states toutes sù da l’aministrazion. »Sion te la fasa 2 - vegn scrit tel document - e penson che sie de besogn de passar a na fasa più operativa che porte a mudar en prescia le idee te resultac concrec.«

Nos aon sentù l’ombolt de Moena Edoardo Felicetti.

L grop »N projet per Moena« à manà ite n document con na lingia de proponetes. Aede tout sù chel che l’é stat domanà?
Edoardo Felicetti: Su proponeta del grop »N projet per Moena« l’era stat metù sù doi comiscion de laor, una che vardava come che se podeva aidar i operatores economiches per la fase 2 e una che vardava i aspec soziai e sanitaries. Le proponete che lori i à fat le era jà state tote en conscidrazion te cheste comiscion. Desche aministrazion volon far valch de concret respetan dute le normative e le limitazion che ne met i protocoi de finanza. Ades che i muda l protocol de finanza locala del 2020 e i dajesse la possibilità, con l’arvanz de l’aministrazion del 2019, de ge jir encontra ai sentadign con maor libertà de gestir le tarife de comun, volon tor sù chesta ocajion per ge dar n aiut concret a la jent. Se rejona tant de endrezar dejenfestazion, test sierologics, ma l’é dut robe che no à na valenza zertificada scientifica, l’é chele robe mingol emprovisade che le é state fate entorn più desche sperimentazion che con la segureza che le podesse aer n efet utol. 

De più su La Usc stampèda de vender ai 15 de mé 2020.  (Monica Cigolla)