La Usc di Ladins

La Jonta de la Provinzia de Trent à cernù Fascia per sia terza scontrèda sul teritorie. Anché vender ai 11 de jugn da les 10 da doman l president Maurizio Fugatti e duc i assessores de l’esecutif provinzièl se à binà te la senta del Comun de Sèn Jan, olache a ge dèr l benvegnù l’era l’ombolt Giulio Florian, l procurador Giuseppe Detomas, la senatora Elena Testor e l conseier ladin Luca Guglielmi, apede ai ombolc di etres comuns de la val.

Apede a tor dant e deliberèr sui desvalives temes provinzièi, te la scontrèda l’é stat portà dant desvaliva costions che revèrda più avisa l teritorie e la comunanza de Fascia. 

Un di temes de emportanza l’é chel de la varianta anter Cianacei e Ciampedel che – à confermà Fugatti – la vegnarà portèda inant, ence ajache te l’ultim decret »ristori« l’é na pèrt che pel vegnir destinèda ence a la operes publiches e donca pel jir ite apontin ence chest’opera che Fascia speta da egn e egn. Respet ai 120 milions che era stac preventivé per l projet che ge era stat portà dant en videoconferenza ai aministradores fascegn, l’é stat ampò n smandrament del projet e de la speisa, che ades é quantifichèda te 70 milions de euro. Apede chest jirà inant l confront col teritorie per la projet BRT: per chest l’é pervedù de se emprevaler di finanziamenc che ge vegn dat al Trentin per la infrastruturees per i Jeghes Olimpics del 2026.

L’ombolt de Sèn Jan Florian à ben segur tout l’ocajion per ge meter dant a la Provinzia ence de autra costions de gran urgenza per sie Comun, prum de dut l besegn de intervegnir en prescia sui bosserlaic e su la rei de la èghes da beiver e de cheles biences e neigres, soraldut sul tegnir de la frazion de Vich.

Sun desch ence na lingia de intervenc che enteressa l stradon a Sèn Jan, pean via da la rodadoa sunsom Ciarlonch, coi lurieres che ades é peé via ma che prest i cognarà se fermèr per la sajon e i jirà inant l meis de setember, e dapò l Pont de Sèn Jan, ence chest coi lurieres jà envié via, e la fermèda de la corieres ló da la scoles.

L’é stat amò rejonà de la senta per l Ski College, che la Provinzia à emprometù de comprèr ló da Aloch (veia senta de la FUCI) e del pont per i vazins a Sèn Jan.

I aministradores fascegn à metù dant ence l projet de mobilità sun fun e la costion de la »repartenza« turistica, vardan a l’istà, ma amò de più a l’invern che vegn, che l met dant problemes maores.

L lurier de la Jonta à revardà ben segur ence costions che va sorafora l tegnir de Fascia, con la discuscion e la deliberes per la operes per i Jeghes Olimpics 2026, soraldut per intervenc sun strèdes e su la strutures per la garejèdes a Piné, Pardac e Lago de Tieser.

La PAT à sotescrit la convenzion con Busan per l sperlongiament de la linies SAD dal Sela a Cianacei e per l recognosciment de la Guest Card per chesta linia e per chela de la Val d’Ega. Amò l’é stat deliberà su la tarifa per l trasport di studenc, che – dò esser stata debant per chest an – la é stata arbassèda per l’an de scola che vegn.

Fugatti à palesà ence sie cruzie per la scontrèdes anter jent e orsc states chisc dis e l’à dit de ge aer scrit per chest ai ministres Lamorgese e Cingolani. En ultima l President à metù en consaputa di ultimes dac en cont de Covid, coi numeres de positività ai tampons e de vazins fac.  (Lucia Gross)