La Usc di Ladins

La cumpra de operes d’ert alda pro le sostëgn basilar dles repartiziuns culturales dla Provinzia de Südtirol. Atualmënter é chi 420 laurs d’ert de zirca 100 artistes y artisć dantadöt te locai dla aministraziun publica o te posć de interes publich. Dötes chëstes operes é documentades – dlungia a passa 290.000 – online, da odëi tl catalogh dl patrimone cultural de Südtirol sot la misciun internet
https://www.provincia.bz.it/catalogo-beniculturali/it/default.asp

A na mainira nia zitia pól gní platerné fora tla banca dac i contignüs de plü museums, pici y gragn, y  de coleziuns. Döes mostres virtuales speziales presentëia sëgn laurs de artistes y artisć. Al é la mostra "Zircostanzes" che publichëia les operes d’ert tl ambiënt cuotidian dl laur dl’aministraziun, ti locai dla Provinzia. Le fotograf südtiroleje Marco Pietracupa inrësc cun so essay fotografich, gnü a s’l’ dé dal’aisciöda 2020 sot la pandemia, la corelaziun dles operes y de sü posć danter casualité y impostaziun. N detai de chësc essay fotografich é da odëi online.

L’atra mostra é na documentaziun fotografica dla esposiziun "Unlearning categories" tl Museion, le museum d’ert moderna a Balsan. Tl isté 2020 á la Repartiziun provinziala todëscia presenté al publich na cerna de laurs artistics fora dla spana de cumpra dal 2012 al 2018. Le fotograf südtiroleje  Luca Guadagnini á documenté fotograficamënter la esposiziun y la corelaziun di laurs cun i spetadus. Ince chiló él da odëi na documentaziun fotografica.

La banca dac doía y le catalogh dl patrimone artistich y cultural de Südtirol instës vëgn gestí dal Ofize por museums y archirida museala dla Repartiziun provinziala Inovaziun, inrescida, université y museums. Le presidënt dla Junta provinziala Arno Kompatscher dij: "La registraziun digitala dl patrimone cultural tla Provinzia é n fatur important por söa visibilité. Chësc é gnü dër tler l’ann passé: istituziuns á metü man da tó sö y mostré digitalmënter les coleziuns, ci che á arjunt interessënc nüs dalunc y daimpró. La Provinzia sostignará ciamó deplü tl dagní la digitalisaziun di contignüs dles coleziuns."

Informaziuns de chësc vers y por le catalogh ofizial partësc fora l’Ofize di museums y dla archirida museala.

Informaziuns söla cumpra de operes d’ert dla Provinzia por chësc ann 2021 pón pié do söl portal dl’ert y cultura dla Provinzia, y sön https://www.provinz.bz.it/kunst-kultur/kultur/kunstankauf.asp  (Iaco Rigo)