La Usc di Ladins

Scebëgn che al vëgn danterite val’ temporai, sinton ince tl Südtirol les conseguënzes dla sëciora y dles temperatöres altes, che nes acompagnará ince i dis che vëgn. Chësc lascia pensé ala festa dl Cör de Gejú, che i tignun en domënia ai 26 de jügn. Te nosta provinzia él la bela tradiziun da jí a fá i füc, ci che ascogn indere ince le prigo da mesdefüch. Forsc n’él ciamó de chi che se recorda la festa dl ann passé, canche al é rot fora n gran medefüch sön le Fennberg, che á impegné por plü dis n gröm de stödafüch. Le prigo da mesdefüch án ince iniann. L’assessur ai bosc Arnold Schuler inviëia te n comunicat da mëte averda cun füc dlungia bosch: "Por gauja dla sëciora che tëgn pro, pó ince na tiza gaujé n medefüch". Al recorda che aladô dla lege provinziala forestala él proibí da fá füch te bosch o a manco co 20 metri dal bosch. Chi che ó le fá en la festa dl Cör de Gejú, adora na conzesciun aposta, che é da damané pro l’Ispetorat Forestal.
La Provinzia recorda ince che sce valgügn vëiga n medefüch, mëssel atira alarmé i stödafüch, cherdan sö le 112. Informaziuns de chësc vers ciafon ince sön la plata dl Sorvisc Forestal (www.lausc.it:10443/administrator/index.php?option=com_k2&view=item) y sön chëra dla Ajentöra de Proteziun Zivila ( https://afbs.provinz.bz.it/ )  (pablo)