La Usc di Ladins

»Ciüf« é le tema dla Maratona dles Dolomites ­Enel 2022, manifestaziun sportiva che á iniann indô podü gní organisada zënza messëi tigní ite le gromun de regoles preodüdes l’ann passé dala pandemia. Al sará insciö na ediziun che garatará tl sëgn dla normalité y dla liberté y che odará en domënia da doman al start 8.000 ziclisć – nia plü 9.000 sciöche pro les ediziuns dan le Covid. An ó in­ sciö – cun n numer mënder de parte­zipanc – garantí n evënt de cualité, n evënt che se oj ince tres deplü dl vers dla sostenibilité. Al é gnü investí y lauré dassënn por smendrí l’impat ambiental dla manifestaziun y la Maratona á ciafé la zertificaziun de »Green Event«. Por ejëmpl, án cumpré ite tais y pestech de ceramica de spidl por redüje dl 70% l’adoranza dla plastica, al gnará anuzé en gran pert materiai reziclá o reziclabli, i mecanics ne jará nia plü incërch cun auti, mo cun rodes eletriches y insciö sará feter düc i mesi che se spostará en chël de sön strada alimentá a strom. Sciöche dagnora gnarál ince indô fat benefiziënza y passa 1.500 volontars daidará ince en chësc ann, por che la Maratona pois garaté, por che al pois ester n bel de de sport, agonism y dever­timënt por düc i amanc dla roda.

Nos un incunté le presidënt, Michil Costa, y ti un fat n'intervista che i podëis lí tla ediziun stampada d'La Usc da incö, vëndres ai 1. de messé.   (kp)