La Usc di Ladins

L destach sun Marmolèda di 3 de messèl l é stat n event fora de anter. Che ve aede troà dedant en domenia e co ge aede fat front?
Thomas Zanoner Segur l é stat la prima oita che se aon troà dedant a n event coscita, e no l die demò gé che son tel socors dal 2004, ma i lo à dit ence chi che i é int da n mulge de egn.
Chel che se aon troà davant l é stat n scenarie desferent da duc chi che sion usè. Chel che se à fat sobit l é stat vardar a la segureza di socoridores, donca l é stat tegnù sot control l raion del destach e duc i operatores e socoridores che laorava olache se aeva depojità chesta levina de giacia i era en contat radio con chi sunsom che i tegniva sot control. Canche l era n minimo segnal de valch auter toch che se möveva, se vardava de se meter subit en segureza. L prim intervent l é stat fat per troar le persone feride o ence chele jà zenza vita ma che l era fazile recuperar, dapò canche se à vedù che deventava semper più difizile e semper manco speranza de troar jent viva, l é stat valutà la situazion e dezidù che ge voleva pensar a la segureza de operadores e socoridores e i tirar fora da la zona.

Zachei à rejonà de ‘tragedia anunzièda’. Chest pericol podeel esser pervedù?
Na, segur de no. Per poder preveder cheste robe tu cognesse tapezar de sensores duc i giacees e no l é nience da poder pensar. Ence a monitorar i giacees se pol capir che l é l pericol de n destach, ma no se poderà mai saver i tempes.

 (Lucia Gross)