La Usc di Ladins

50 agn é mez secul, na spana de temp longia, does generazions... Vigni temp à sies carateristiches y si avenimenc, chisc ultims 50 agn ruva tla storia dantaldut per l svilup tecnologich y tecnich, y per l gran saut tla dimenjion digitala dla comunicazion y informazion. "La Usc di Ladins" é steda bona da jì con i temps, mostran prejenza sun les plataformes de internet y ence sun i socials (con atualmenter passa 7900 "me plej" sun facebook y passa 8200 "followers" sun facebook). Tratant che l'oferta digitala é gnuda svilupeda inant, n’à la editoura y la redazion nia volù lascé per troi i abonés a la edizion stampeda dl vender che resta n letorat fedel y prezious, y che ti passa inant l foliet ladin edema per edema ence a les generazions plu joenes.
N foliet ladin con publicazion regolara végnel fora dal 1949 encà, da canche l diretour de scola a Urtijei Salvester Erlacher (che fova nasciù dl 1910 sun l luech de Plaza tla vila da Frena a La Pli de Mareo) ova abù l’iniziativa adum con n bel grup de idealisć che tigniva sun la notizia ladina y union ladina. El ova porté inant si projet "Nos Ladins" enchin ai prums de jené dl 1972, tolan spo comié dai trueps letours y colaboradours.