La Usc di Ladins

Per fèr cognoscer l ultim numer de la revista ‘gana’, la redatores Olimpia Rasom, Ingrid Runggaldier e Anna Mazzel les à cernù ence chest’outa la formula de la picola prejentazions sorides e informales, outes più a ‘jent che ge tegn’ che a autoritèdes e raprejentanc istituzionèi.

En vender ai 23 de jugn entorn i desć de la Baita Ischia de Ciampedel l era ampò na bona carantina de persones, per gran pèrt eles, ma ence desvalives omegn.

Vegnuda fora tel meis de mé, l’ultima ‘gana’ à per titol »L’autra vijion« e la ge era stata sporta a duc i letores de La Usc di Ladins col numer 21 de nosc sfoi. 

Chest l é n numer più ‘politich’, à dit Olimpia Rasom, do chel de la eles e l schi che l era più dedicà a momenc e recorc de nosc raion. L é n numer che se aur a dut l mond e l met dant l bel e l burt de la sozietà che muda, vardan de ge lascèr lèrga a vijions desferentes. I articoi de la trei redatores e de n muie de colaboradores ne met dant stories, vita e pensieres de eles che recorda l besegn de meter dantfora l respet per duta la persones e per l ambient. 

A n muie de eles tel mond chest respet ge vegn neà, tel Afghanistan, descheche ne conta Elide Mussner, ma ence da nos, con violenzes de ogne sort che pea via da n lengaz che vel ge tor degnità, coche recorda la trei redatores te »Canche la parola l é l prum at e la mort l ultim«.

De più su La Usc stampèda de vender ai 30 de jugn.  (Lucia Gross)