La Usc di Ladins

Na neva publicazion preziousa se jonta al patrimonie de studies portà inant ti egn per ge dèr n fondament scientifich a la cultura e a l’identità de Fascia. En vender ai 8 de setember a Sèn Jan vegn prejentà l liber »Letres da Larcioné. Amadio Calligari a Tita Cassan (1887-1897)«. 

L volum, dat fora adum da l’Union di Ladins de Fascia e dal Istitut Cultural Ladin met dant n gran lurier de analisa fat da Fabio Chiocchetti, che ne fèsc cognoscer personajes, tradizions, paroles desmentièdes e curiositèdes pean via da documenc de la fin del 1800. Per saer vèlch de più aon rejonà col autor.

Peon via da le letre. L titol disc che le vegn da Larcioné, co ve éle ruade te man? 

Fabio Chiocchetti Cheste letre le cognosciaane jà dal 1984, da canche con Ulrike Kindl aon publicà »Märchen und Sagen aus dem Fassatale«. Na part de le lejende, chele più misteriouse e straneouse ambientade sul Ciaslir de Vich e documentade da Hugo de Rossi, le vegnia fora da n Briefzyklus, n zicle de letre de la fin del ’800 copià ju dal medemo de Rossi, che fazile l le aea abude adimprest e l aea cognù le reter. L era una soula letra originala e da chela aon podù confrontar e valutar le trascrizion del de Rossi, ma l inom del autor era stat descancelà, no se sà per che rejon.

Su La Usc de en vender al prum de setember podede lejer duta l'intervista. La prejentazion sarà en vender ai 8 de setember da les 5 domesdì te sala grana del Istitut Cultural Ladin a Sèn Jan.

 (Lucia Gross)