La Usc di Ladins

Iu scrii poesies y al me sá bel y al me fej bun da perié. La poesia implësc mi cör y ince nüsc cörs. Sciöche ince l’oraziun trasformëia nosc cör y nüsc cörs. La poesia y l’oraziun purifichëia nüsc sentimënc y nüsc pinsiers. Canche y olache la poesia y la oraziun s’incunta dailó náscel la ligrëza, la bona löna, la speranza y l’amur. Vigni porsona á poesia te so cör y vigni porsona pó ince se daurí al’oraziun, ala meditaziun, al rengrazié. Poesia y oraziun é n dilan ala vita, al’esistënza. 

La vita de vigni porsona é na scincunda d’amur. Dles porsones o ince de Chël Bel Dî. Porchël ciafa tröpes porsones ti sentimënc y tl’armonia dla poesia y tla forza, tl amur y tla pêsc dl’oraziun chël abrac de chël che i ún düc tan debojëgn. La poesia é le pordonn danter porsones, le pordonn por i gragn dolurs che la vita te dá. Porchël rengraziëii, scrii poesies y prëii vigni de danü. Tan inant che i sun bun! Y chësc me fej sté bun. Y chësc me dëida val’ iade ince da fá sté bun les atres porsones incër me ia y chëres plü dalunc. Porchël rengraziëii le Signur che me inviëia al’oraziun y me scinca les poesies, che iö prói spo da dé inant ai atri. Y l’amizizia che nasc val’ iade tres la poesia y l’oraziun é tan bela. Plëna de pêsc, d’amur y de liberté.

Christian Ferdigg