La Usc di Ladins

Festa grana a Pardac per l’inaudazion de la neva biblioteca, o più avisa de la neva ‘Stazion destinazion cultura’. Chiò i inomes i à dassen na gran emportanza, per via che la neva Stazion culturala sarà zeche de auter da la classica ‘Majon di libres’ che duc cognoscion e aon abù desche model e referiment di egn passé. 

A ogne bon cont en sabeda ai 24 de firé lo da la veia stazion de la ferata Ora-Pardac n muion de sentadins de Pardac e de autoritèdes se à troà per veder la neva senta, che dassen porta la biblioteca a esser zeche da nef, a esser chel zenter de cultura, sozialisazion, inclujion per duc, zenza lascèr da na man nesciugn.

A taèr la veta l é stat l capocomun de Pardac Giovanni Aderenti, dessema al ex assessor a la cultura Lucio Dellasega, la ex ombolta e ades conseiera provinziala Maria Bosin, e amò la funzionaria provinzièla Sara Guelmi e Antonella Agnoli, che per diesc egn ge à stat do per ge dèr ènema a na biblioteca che vae sorafora l liber e che enveze, ence aldò del inom, dovente n zenter de scontrèdes, n zenter da viver e fèr viver.

Duc à portà n curt salut, ma che conta saer l é l gran lurier ideèl che Antonella Agnoli, maora esperta tel setor de la biblioteches, l’à portà inant. Agnoli da egn disc che la biblioteches à da mudèr, per ruèr a esser n post lo che troa lèrga duc, da la sociazions a la jent del paisc, da la femenes che fèsc maia ai bec che à a la leta na sala de registrazion e na sala lo che i modelisć fèsc veder la veia ferata de Fiem. 

Donca se pel ruèr te la neva Stazion per se chierir n liber, ma ence per lurèr col acherle, la neva vijion de la biblioteca l é chela de n post lo che duc posse troèr sie motif per meter pe laite.

L é na bela strutura con n muion de sales e te mez la piaza, desche te n paisc o na zità, na piaza che chiama duc e l é averta a duc. 

De più su La Usc stampèda de en vender al prum de mèrz.  (Domenico Volcan)