La Usc di Ladins

Chësc vëndres ai 6 de dezëmber danmisdé él gnü presenté i resultac dla cumpedada linguistica, che ciara fora insciö: le grup todësch fej fora le 68,61%, chël talian le 26,98% y le grup ladin le 4,41%. Respet ala cumpedada fata dl 2011, á ma le grup talian albü n plus, plü avisa dl 0,92%. I atri dui grups é jüs zoruch. Sambëgn che na flesciun n’é nia bona por na mendranza; dl ater vers pón dí che i Ladins s’á impó dolarata ciamó tigní bun, cun na flesciun de "ma" le 0,12%. Le grup todësch é indere jü zoruch dl 0,80%.

La Val le comun "plü ladin", Urtijëi chël che perd deplü.
L’istitut de statistica ASTAT, che á cumpedé fora y analisé i dac, á ince fat na statistica aladô di comuns, olache al é de gran desvalianzes por ci che reverda les porsones detlarades ladines. Te düc i comuns ladins é la porcentuala di ladins jüda zoruch. Le plü ésera carada a Urtijëi, cun na flesciun dl 4,44%. Le comun "plü ladin" tles döes valades é indere chël da La Val, cun na porcentuala dl 96,45%. Mareo é indere le comun che á tigní al miú bot respet ala cumpedada dan 13 agn. Cun na porcentuala ladina dl 92,23% ál davagné le 0,14%.

VAL BADIA
Badia 91,67% de ladins (-2,40% respet ala cumpedada dl 2011)
Corvara 87,12% de ladins (-2,58%)
Mareo 92,23% de ladins (+0,14%)
La Val 96,45% de ladins (-1,21%)
San Martin de Tor 92,78% de ladins (-3,93%)

GHERDËINA
Urtijëi 79,75% de ladins (-4,44%)
Santa Cristina 87,79% de ladins (-3,61%)
Sëlva 87,18% de ladins (-2,56%)

VAL’ COMUNS VIJINS
Ciastel 15,81% de ladins (+0,44%)
Pruca 4,49% de ladins (-0,74%)
Laiun 6,59% de ladins (+0,45%)
San Laurënz 2,22% de ladins (+0,17%)

Deplü sön i resultac dla cumpedada podarëise lí t’La Usc di Ladins stampada di 13 de dezëmber  (pablo)