La Usc di Ladins

«Anter i trueps professours dles universités dla Talia o forestes che se à dé ju con l ladin dolomitich, l professour Guntram Plangg é dessegur chel che é resté plu fedel a chest argoment, nia demé a livel scientifich con dejines de articoi y contribuc, ma ence a livel personal…» 
Coscita scrivea l professor Paul Videsott, che per n muie de egn l é stat arlief de Plangg te l’Università de Dispruch, te la introduzion del numer 35 de Mondo Ladino dedicà ai studies toponomastics del prof. Plangg e dat fora del 2012, canche do 35 egn de prejenza te la Comiscion Culturala del Istitut Ladin de Fascia, e 25 da president, Plangg se enjignèa a ge passèr l testamonech de president de la CC a n’autra fegura academica che à dat e fat trop per i ladins, la professora Ulrike Kindl. Apontin enlouta ence l medemo prof. Videsott jia a fèr pèrt de chel organism che l é stat per l Istitut de Fascia e per sie diretor Fabio Chiocchetti n pont de referiment scientifich e cultural prezious. 
Nasciù ai 19 de jené del 1933 a Bürs, na zitadina del Voralberg olache l veior lengaz romanc à abù regnèda fin al XV centené, l professor Plangg se à cruzià de ladin, e en particolèr de ladin dolomitich, te duta sia cariera scientifica de passa 50 egn e l lo à fat con gran pascion. 
Dant del numer de Mondo Ladino del 2012 recordà de sora, jà del 1998 l numer XXI de la revista scientifica del Istitut Cultural fascian ge era stata dedichèda al professor Plangg en ocajion de sie 65° cedean «per ti desmostré al prof. Plangg – scrivea l diretor Chiocchetti – nosta reconescenza per l laour che el à fat de duc chisc agn, dai 1977 inant, denant desche comember y dedò desche president dla Comiscion Culturala dl Istitut Ladin ‘majon di fascegn’»
La burta neva de sia departida é stata data en domenia ai 29 de dezember a la radunanza de la Sociazion Heilmann, de chela che ence l professor Plangg era sozio, ajache del prof. Luigi Heilmann l é stat ence gran amich. A la radunanza de la Sociazion Heilmann, Plangg l é stat recordà desche academich da la presidenta Cristina Donei, e ence desche amich da Fabio Chiocchetti e Paul Videsott.
Chiocchetti l à recordà con emozion l gran contribut dat dal professor al Istitut, a la cultura e a duta la comunanza ladina, no demò con sia competenza scientifica, ma ence con sia gran umanità, e l à reportà ence la paroles de la prof.a Ulrike Kindl, che recordèa con encresciujum i tempes de lurier e empegn portà inant adum con gaissa, pascion e amor per l lengaz ladin.
Videsott à dit che l à abù ocajion de veder l professor acà zirca doi meisc e Plangg, che l saea che no l aessa più podù ruèr chiò de persona, l ge à racomanà de ge saludèr duta la Ladinia.
La messa de sepoltura sarà en sabeda ai 4 de jené 2025 da mesa les 11 inamesdì te la gejia de Rum Sankt Georg te l'Austria.

 (Lucia Gross)