La Usc di Ladins

La setemèna passèda l Consei de la Provinzia de Trent à aproà la manovra de assestament de bilanz de previjion per i ejercizies finanziaries 2025-2027. Te chest contest l é stat aproà, con l’astenjion de gran pèrt di conseieres de mendranza, la proponeta de orden del dì prejentèda dal conseier provinzièl ladin Luca Guglielmi, ensema al conseier Walter Kaswalder, che revèrda la Marmolèda e la scomenzadives che pel ge dèr sbunf a sia promozion turistica.
Con chesta proponeta l Consei provinzièl domana che la Jonta se dae ju per svilupèr, travers i atores prinzipèi del sistem marketing turistich-teritorièl (Trentino Marketing e ApT de Fascia), scomenzadives e evenc de fort impat comunicatif e rechiam turistich, soraldut al scomenz e a la fin del istà, ence con referiment al Jouf de Fedaa, per sostegnir l slongiament de la sajon a benefizie de la realtèdes economiches sul teritorie.

Se pel lejer dut su La Usc nr 29 dal prum de aost: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.

 (MCI)