La Usc di Ladins

Cun de 7 d’otober 2025 á la Junta provinziala de Balsan mené fora n comunicat stampa cört, che dij che dal’atra edema inant gnará les sentades dla Junta tignides de vëndres y nia plü de mertesc, y che les dezijiuns plü importantes ti gnará comunicades ai media tres comunicac stampa, ajuntá chiló y iló da declaraziuns video. Ti caji de dezijiuns de maiú relevanza – insciö la Provinzia – gnaral tigní na conferënza stampa di mëmbri de Junta de competënza tla tematica relativa tl salf Widmann, Ciasa dla Provinzia 1. I media gnará inviá a chëstes conferënzes adorassá, preodü n’él nia la direta streaming.

TUTA DE POSIZIUN CRITICA DA PERT DL ORDIN DI JORNALISĆ DLES PROVINZIES DE TRËNT Y BALSAN

La dezijiun dla Junta provinziala de Balsan da ne tigní nia plü la conferënza stampa tradizionala do les reuniuns edemales por lascé al savëi les deliberaziuns tutes, rump defat n liam essenzial tla colaboraziun danter govern y zitadins.
L’intenziun da sostituí la presënza di jornalisć cun mené fora comunicac univocai y videos autoreferenziai, ciava sotfora la democrazia. Tolon demez l’incuntada cun la Junta, evitëion che i jornalisć fejes domandes söla versciun ofiziala di fac politcs, an ignorëia chël dialogh critich che ti speta ai zitadins y garantësc na informaziun avaliada.
L’Ordin di Jornalisć dl Trentin Südtirol condanëia a funz la dezijiun da straiché le confrunt edemal cun la stampa, se ghiran dal Govern provinzial le respet sides por la profesciun jornalistica co por l’interes general a na informaziun lëdia, sconá dala Costituziun Taliana. 

Defenon le jornalism, defenunse nosta democrazia – stlüj jö la Presidënta dl Ordin di Jornalisć dl Trentin Südtirol Sandra Bortolin.