La Usc di Ladins

Ai 17 de jené con Sènt Antone vegn desleà Carnascèr. Chest an la sègra de Dèlba sarà viventèda da la seconda edizion del Forum de la Mascherèdes Arcaiches Dolomitiches, n event publich de la Rei de la Mascherèdes Arcaiches Dolomitiches de la Provinzia de Belun, Fascia e la Ciarnia, nasciuda per scomenzadiva del Museo Maschere Dolomitiche de Gianluigi Secco de Borgo Piave (Belun). Chesta Rei, che à desche zil la candidatura de la Mascherèdes Arcaiches Dolomitiches desche patrimonie imaterièl UNESCO, estra che scomenzadives de stravardament e valorisazion de chest rit, la é metuda adum da raprejentanzes de la mascherèdes del Agordin, con Laste e Staguda, Selva, Canal, Riva; de la Val de Zoldo con Fornegiśe; del Comelich Superior con Padola, Dudlè, Sćiamazégn e Ciandidi; de Fascia con Penìa e Dèlba; e de la Ciarnia con Sappada-Plodn, Sauris-Zahre e Timau-Tischlbong.
L Grop de la Mèscres de Dèlba e Penia, col didament scientifich del Istitut Cultural Ladin, che l é ence comember de la medema Rei, se à dat ju percheche chest event rue belapontin te noscia val, de gra al sostegn finanzièl del Comun General de Fascia, del Comun de Cianacei, de la Frazion de Dèlba e de la SITC.

Podede lejer dut su La Usc dai 16 de jené da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)