La Usc di Ladins

L é stat na bela emozion per Fernando Brunel inaudèr en sabeda passèda l Tobià de Val, tanche metù a post, e la mostra del artist ladin ROTT. l president de l’Union di Ladins de Fascia à volù fèr fora l tobià del Cincent rità da si bèrbesc e l meter a la leta de la sociazion ladina per poder ge dèr alberch a mostres, valorisèr l'èrt ladina e renforzèr l contat con l’autra valèdes ladines ence te chest ciamp. Per envièr via chest percors nef Brunel à domanà sie pecont da La Ila, Lois Rottonara, artist cognosciù a livel internazionèl, che é ruà a Vich compagnà da la fia Susy, palesan n leam strent che ti egn à valorisà la lejendes ladines travers doi sorts de èrt desferenta, chela de pitura e scultura l père, chela de la musega la fia. Ence l president de l'Union Generela di Ladins dla Dolomites é ruà a portèr sie salut recordan che no demò l lengaz, ma ence i mic l é patrimonie comun del popul ladin e a rejonèr del valor e del stel artistich de ROTT l é stat envià la professora de storia de l’èrt Lorenza Florian.
La mostra, che met dant trenta operes, resta averta ogne dì enscin ai 25 de messèl da les 16:00 a fin les 19:00.

Podede lejer dut su La Usc stampèda dai 3 de messèl da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)



 (Nicoletta Riz)