Lungiarü zënter di paisc dl alpinist

Data

04 de otober 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Le paisc da Lungiarü á albü le plajëi y la onú da ospité tla fin dl’edema passada le 13. convëgn internazional di paisc dl alpinist, olache an á metü l’azënt sön l’agricoltöra da munt danter desfides, aspetatives y sodesfaziuns
Al é tres plü jënt che chir la munt por süa vacanza, y cun la munt chirai ince la pêsc, le chît, l’autentizité. Che ara ne gareta nia dagnora da pité ci che ai chir, vëigon ti mëisc de sajun alta, olache prozesciuns de jënt rabësc te nostes valades y sö por munts y crëps. N turism de massa che toma tres deplü tla critica. Chësta critica conëscion sambëgn ince a Lungiarü y rodunt porchël án tut la dezijiun da jí n ater tru – le tru da deventé Paisc dl Alpinist. Chësta merscia stá por cualité dan cuantité, por chît impede "action" tresfora, por autentizité, cultura y sambëgn respet por l’ambiënt – patrimone numera un de nüsc raiuns.
Dl 2018 éra garatada da ciafé la zertificaziun y sëgn é Lungiarü sté al zënter dl convëgn internazional de düc i paisc dl alpinist dles Alpes. L’evënt é gnü organisé dal AVS – Alpenverein Südtirol, deboriada cun le Comun da San Martin, la Cooperativa Turistica Al Plan/San Martin y le grup de laur dl paisc dl alpinist a Lungiarü. Al é le pröm iade che le convëgn vëgn metü a jí tl Südtirol y atira i ára toché al paisc ladin. Passa 90 rapresentantes y rapresentanc di paisc dl alpinist dla Talia, Germania, Austria, Slovenia y Svizera é rová tla fin dl’edema passada a Lungiarü, olache al é gnü metü l’azënt sön l’agricoltöra da munt ti 35 paisc dl alpinist. Al convëgn á tut pert ombolc, rapresentanc dla lia da munt, ostis, paurs y rapresentanc dl turism por se confronté sön chësta tematica che ciafa tres plü pëis y importanza. Söl post él rové danter l’ater le presidënt dla Provinzia de Südtirol Arno Kompatscher, l’assessur regional Manfred Vallazza, le presidënt dla Lia da Munt AVS de Südtirol Georg Simeoni y sambëgn l’Ombolt de ciasa Giorgio Costabiei. Söl program dl convëgn êl trëi dis de confrunt, mo ince natöra, cultura y aorela cörta.

T’La Usc di Ladins di 8 d’otober podëise ciafé deplü sön chisc trëi dis de incuntada. Lapró ti unse damané n bilanz y na aodanza a Christoph Alfreider dl grup de laur. Intratan ves pitunse valgünes impresciuns fotografiches, metüdes a desposiziun dal Alpenverein Südtirol.

Fotos: © AVS Südtirol  (pablo)