La Usc di Ladins

Impröma l’abrac de sü compagns atlec do l’ultima gara de Copa dl Monn a Flachau, y spo l’abrac de süa jënt. Manfred Mölgg á en mercui ofizialmënter stlüt jö süa cariera agonistica, do 329 gares de Copa dl Monn, 20 podesć cun 3 devëntes y na copa dl monn de slalom. Lapró 9 campionac dl monn cun trëi medaies y cater olimpiades, dlungia na linia de titui a livel nazional. Ince la comunité d’Al Plan, de Mareo, de sü fans che l’á acompagné te düc chisc agn, á orü rengrazié y fá festa cun Manni. Chësc é sozedü en jöbia sëra te so paisc nadé. La defilada acompagnada dala Musiga, dai maestri de schi y dai jonins dl schiclub é piada ia dales 6 da sëra. Lapró na gücia olache al ê lassura le protagonist, acompagné dai rapresentanc comunai y dla Cooperativa Turistica. Sön paiun de paisc él gnü mostré sö toc de video de chisc 20 agn de cariera, al é gnü tigní i discursc d’ocajiun y pronunzié tröc rengraziamënc.

De döt chësc podarëise lí deplü t’La Usc di Ladins di 18 de merz. Intratan ves pitunse valgünes impresciuns fotografiches  (pablo)