La Usc di Ladins

La sozieté dles Funivies d'Al Plan ti á dé ala scuadra nazionala dai schi svizera la poscibilité da se alené chëstes döes edemes di campionac mondiai a Cortina, sön la pista »Erta« y sön la »Pedagà«. Pla staziun a val dl implant »Piz de Plaies« êl en chësta ultima sabeda 10 pulmins VW cun la scrita »swissski«. Sön chëra ái ponsé che al é bel y ince dërt che al é gnü metü a desposiziun pista y implant a na (bona) scuadra nazionala dai schi por podëi fá so alenamënt en program. Dlungia la staziun nominada él n restorant – bar stlüt, sö l'Ancona y Sarjëi y desco altró döt stlüt por gauja dles desposiziuns corona. I me damani, ne fossel nia te n te' caje dërt y ince n jí adincuntra uman, sce an lascia bele gní adalerch la scuadra, da daurí almanco n bar por che i atlec y les atletes pois jí a se bëre n tê y sté n pü' tl cialt, él pö ma ëi cun le staff sön pista y nia jënt dl post o sciori. Les Funivies Al Plan – y ince le paisc – se fej sigü n bun inom cun i dé la poscibilité da se alené sön de beles pistes desche ares é y foss iniann. Y da chësc tema ciafi sëgn la tle da jí ite tla politica.
Chësta mëss dassënn cambié direziun te chisc tëmps che é sëgn, an ne pó nia ma se tralascé sön la sciënza che n'é nia bona da mostré na unité tles afermaziuns y minunghes sön co manajé chësc Covid. Vigni virologh, infeziologh o epidemiologh la cunta atramënter. La politica ne pó nia porchël lascé sö na pert la ratio sana, che vëiga ince le momënt psicologich y sozial, che dij da daidé la jënt tla vita da vigni de ince te tëmps de pandemies, che dij da daidé y lascé lauré l'economia por evité l'aumënt dla violënza te familia y sozieté a gauja dla psica scassada sö, dala tëma dal dagní y dles dificoltés de finanza che crësc. Al n'é por nia, do mia minunga, stlü döt edemes alalungia, dedô daurí indô y spo indô stlü. Chësc sistem é ma n sburlé fora la pücia normalité che an podess avëi. Numeri di positifs al corona tan alc co sëgn ne sunse mai stá. Plü che an tol liberté y laur ala jënt, plü che la reaziun vëgn agressiva.
Apëna che an á indô n pü' de liberté, mësson se despié le stres psicologich y les frustraziuns che an á ados. Al é da capí che les porsones jones é chiló plü atocades. Les conseguënzes dl nia laur me fej avisa tan pora co la maratia instëssa. Chësta á n tëmp determiné de vita, la dejocupaziun a tëmp indeterminé pó gaujé de gran ferides tla porsona y familia, che ne varësc nia plü tla vita.
Porchël él ince gran ora che i politics ne fejes nia ma le gran cun dí che ai á stanzié miliuns de euro por daidé chi zënza laur o che dá laur, mo che ai vëgnes en tëmp ciamó cun aiüc finanziars denanche al sides massa tert. La jënt vir dl laur y no da ordinanzes o decrec che arfera l'economia y le laur. Chël bëgn messunse, se tigní düc ales regoles metüdes sö por tigní jö le coronavirus, ares vá dötes da fá, spo vara da vire y ince da lauré te chisc tëmps lascian demez le lockdown. Dan 2000 agn, ai tëmps de Gejú, rodâ bele che burta maratia, la lebra. Chi che ê püri viô dalunc dai paisc, dales cités, viô te chës cavernes (Ben Hur). Chi che â la poscibilité da aziché o ti baié ados a Gejú, gnô varis y nëc. Ince nos podun jí pormez a Gejú cun la suplica che al nes dëides. I messun insistí, avëi fede y fidënza te Ël, spo nes dëidel gní fora da chësta pandemia che mëss gní despassada cun l'aiüt ince dla dërta vazinaziun, zënza perde tëmp.  (Stachio Erlacher, Al Plan de Mareo)